Ngā waiata

Nā Pikihuia (Paraone)

E kui Kūmara tēnei te whare i moe ai koe ...e...i

Kia moe atu koe i te whare kino i te marae o Tūmatauenga...

Tītī rere pō, ki ō rere ao tau atu ana ko Waikare...

Rukuhia ē koe te ruku ā te kawau, kia ea ake ana ko Haumapuhia...

Ngaua i runga, ngaua i raro, ngaua i te tipu ake ō Rangatipua...

Tuatua i a Rata i a Wahieroa, i a Tāne e tū ana...

Hai kōiwi mō te tangata, hai rānaki i ō koutou mate...

E tohe Makauri, e tohe te Ariki rere noa ia rā me he rāhui kawau, ki roto o Wairau...

Kia rehu atu ai koe ki te hunga i ngaro ai i te tangata...

Hūnā te kōkōuri, hūnā te kōkōtea, e tū Mariko tata piri ana ki tō taha...

Nā Pikihuia

Taku piki kotuku e ...taku māpihi maurea e...

Tena ka mamate ra ...ki tua o ngā roto e...

Ki taku kai kapua e ...ngā mahi a Ruru e...

Nānā ra i tekateka e...kia tū ki te riri na....aa

Tai taia ra e te umeo o te tōroa e

Kia pai ai koe ra te takoto i te kino na....aa

He tangata…te tangata i tō maka i ngā taria a

Kia pakaru te waka pae noa ki te whānau mai….aa

Nā Tamarau

Taku piki kotuku e ...taku māpihi maurea e...

Tena ka mamate rā ...ki tua o ngā roto e...

Nānā ra I tekateka e...kia tū ki te riringa....a!

Tātaia ra e te humea o te tōroa e (tataia ra)

Kia pai ai koe ra te takoto i te kino nā....a!

He tangata te tangata… i te mata

Nā Pikihuia

Ka tae atu ki tua o te wharau e hine
Kā wehe ko te pō kā wehe ko te ao i ā koe

I tukua atu rā ki tawhiti
He tokouri he tokotea he māpuna kai ure

Kai ure atu ana ngā tohunga ki ngā atua kia mate
Koi tonu ngā niho ki te ngau

Nā Māui i hangarau e hine
Tana ika tapu ko te whenua nui e noho nei tāua

Tikina e ki raro rā wheuriuri
Ki a Hine-nui-te-pō hai ngaki i te mate

I tukuna mai nei ko ana kārere
Ko te waeroa ko te namupoto hai kakati i te rae ki te mata o te hurupiki ē hine....
Tāpāua kā ea ko te mate o te hiku rekareka nei o tē tuna...

E hinemaru nei
Ka taka kei raro ko ngā Atua

Tū ake hoki rā e hine i te tūranga ariki
Hai mau kakara mō hine ki te moenga

Te moenga te whita
Te moenga te au oti tonu atu koe ki raro rā

Matua hurihuri iho rā e hoa mā tā tātau māhuri totara
Nō roto e nō te Wao-tapu-nui-ā-Tāne
Nō te awa i ō Atua
Nō runga i ō karakia

Nō ngā pīngao e i roto i te kōpua
Taku tōtara haemata te rite ai ē hine ki ā koe 

Takoto mai rā e hine i roto i te whare tapu
Ko te whare rā tēnā i tō tipuna i ā Tamamutu 

I tuhia ai ki te tuhi māreikura
Koia ngā hāngai Tama-tuhi-rae

I whakairia e ki runga ki te rākau
Koia te kauhau ō tō pāpā a Māui e hine 

Tērā ia te rua ō Tinirau ko mano
I kēria ai ki te puke oneone hika nui e hine ...

Nā Mihikitekapua

Taku rākau e

Tau rawa ki te whare
Ka ngaro a Takahi e
Te whare o te kahikatoa
Hei ngau whakapae
He whakapae ururoa e hau mai nei
Kei waho kei te moana
Kāore aku mihi e
Aku tangi mo koutou
Mau puku ko te iwi
Ka mō wai tonu te whenua, e takoto nei

Nā Pikihuia

Te rongo o te tuna e hau mai rā

Kai Te Papuni, kai a Wharawhara

Nāu te whakatau, Te uri o Mahanga

Whakarere kai, whakarere waka

Te uri ō Tūhoe moumou kai, moumou taonga, moumou tangata ki te pō

Hinganui atu ra ki te aroaro o Hine-i-reiareia

To kiri wai-kauri, nāWero i patupatu

Tarahau ngā wheua e

Tarahau ki runga o Tangitū

Kia kai mai e te ika i Rangiriri

I tutara-kauika te wehenga kāuki

E tika ana rā mo Te Rou, mō Te Aparakau

Nā Tikitu, na te uri o Whiro ki te pō

Taiwhakaea ki te ao

Haere ki roto Tūtira mo Tiwaewae

Nā tātau koe i tango kino

Kai tu mai ra e tohe i te hau-a-uru

Ka ea ko te mate e

Tenei e Tai ma, nā o tātau kape

Koi hianga i a Te Tamaki mā

I riro mai a Te Heketua, i mate ai Nūhaka

Tōnā whakautu pahi ko te Rama-apakura

Haere ki roto o te Mahia mo Kahawai

Mō Kauai-hurihia

Inumanga wai i Te Rito-o-te-rangi

I te pa taea i Puke-karoro

I tangi ai te umere

Pe noa ki te one i Taiwananga

Nā Mihikitekapua

Engari te titi e tangi haere ana…
Whai tokorua rawa rāua
Tēnā ko au nei e manu
Kei te hua kiwi i mahue i te tawai
Ka toro te rākau kai runga rā
Ka hoki mai ki te pao Ka whai uri ki ahau 

Noku koia ko te wareware…
Tē whai au i te tira haere
Ko te Hirau whakangaro ana
Ngā hiwi maunga ki Huiarau
Kia ringiahia ki te roimata
Ko te rere au ki Ngauemutu rā 

Ko au anake ra i mahue nei e…
Hei hēteri kiritai ki te Mātuahu
Hei titiro noa atu ki waho rā
He waka hērā e rere atu rā
Whakatika rawa ake ki runga rā
Ka momotu ki tawhiti mā wai ia rā e whai atu….e

E moe Kaihau i tau moe reka
e ara ki runga
Kauwhatatia te kauwhata a te Atua
Kia puta noa mai, kia korerotia
Ka hoatu ki tona tini ki tona mano
Tu mania, tu paheke te tu kukume te tupono te takoto i raro ra
Ko te mate kino nei
Ko ana haere iti, ko ana haere rahi
Rikiriki naonao ko te tama a Te Petipeti
Ko te tama a Te Rangahua
Kuku mata whare, kutia mai ra
He kauhau ariki, he kauhau taniwha
Ko Tama–kai-moana, ko Toroa Ko Tawhaki-o-te-rangi
Ka puta ra koe ki te whaiao, ki te ao marama
Ka ngarue i te whenua
Ka ngaoko i te moana
Tangi ai e hine o iwi ki a koe
Ka riro atu na koe i ohou tipuna
I a Mate, i a Pirau, i a Ngaro-ki-te-po
Tuhikitia i a Tuhapainga
Tumarere i runga, tumarere i raro
Kai ai te aroha i roto i te tangata
Ka riri te tapuwae, ka niwha te tapuwai
Tahe toto te tapuwai
Haramai te mate hai kai e….!

Tipi nuku, tipi rangi
Ko koe hai tipia noatia
E hohou nuku, e hohou rangi
Hinga atu, hinga mai
Takoto i Pīpī, takoto i Waimana
He tapu te rangi, te tuatuaia
He tapu te rangi, te wawahia
E kī mai ana koe me nukunuku
Me nekeneke i runga i o iwi
Koia tama amo ake, amo ake Potiki
I tona raukura i a Kaihau
Tuaia e te mate ka hinga ki raro
Ki te pōuriuri, ki te pō tangotango
Ki te pō oti atu ki a Ruaimoko
Whakarērea iho ana te tangi a Hiakita
Ko Manini-tua, ko Manini-aro
Ka tangi a Taituha ka tangi wiwini
Ka tangi a Kurawha, ka tangi wawana 

Kukutia to rukutia hei!

Ka mea Tawera e

Me kawe rawa ia ki te wai
Kia wetewetekia tō kiri e
Ki te wetewete nā kahukura i te ati

Ara pea koe ra...kai runga o Ariki–rau

Kia tū mai koe rā...ki te kōrero o te toa

Ki te whaitiri pā tahi e
Ki te tuku whakaparapara

Ki te hopu ika i te ati e
Kai hoki te ingoa

Kaore te mokemoke te tuohu noa nei e

I te pō roa i te pō makariri e...

Tu mai e hika kia poipoia koe e...

E hoa ma e katahi nei hanga kino e...

Ko aku koiwi kau te tirohia mai na e...

Ka taka ko roto nei ka māwherangi au e...

Ko wai e/ka kite atu i te whiu a te Atua e...

Ka pā mai ki ahau whakahiamoe ai e...

Ka mate i te marama ka kohiti ko te toru e...

E waha e hika ka haere taua e...

Ki raro o mania ki waho ō Neketuri e...

Ka hoki taua ki te whare huri ai e...

Pinepine te kura, hau te kura
Whanake te kura i raro i Awarua
Ko te kura nui, ko te kura roa
Ko te kura nā Tūhāe-pō

Tēnei te tira hou, tēnei haramai nei
Nā te rongopai, nā te rangimārie
Nau mai ka haere tāua ki roto ō Tūranga
Kia whakangungua koe ki te mīni
Ki te hoari, ki te pū hurihuri
Ngā rākau kōhuru a te pākehā e takoto nei...

Piki ake, kake ake, i te toi huarewa
Te Ara o Enoka i piki ai ki runga
I rokohanga atu rā maikuku, mākaka
Hapainga te aroha, he waha i pā mai
Taku wahine pūrotu, taku tāne pūrotu
Kōrua ko te tau e

Whakakake e te turei i te kīnga o tō waha
Nō runga rawa koe,
Nō te mana o Kuini e tū nei
Nā rangitū koe, nā Te Kotahitanga
Nā Tāne rawa koe, nā Pure-tawhiti
Nā kaunati hikahika
Te kaunati a tō tipuna a Rawiri
I haere ai i te rei nui ao
Ka hika i tana ahi
Kimihia e te iwi, te ara o te tikanga
I pai ai te noho i te ao nei...

Kai Tūranga-nui, he matā pū
Hei patu i te tangata kia mate
Nā te maungarongo hoki rā
I haere ai te ara
Ko koutou anake e titi kaha mai nā
E kai o koutou mata i te kohu e tatao
I waho i te moana o Toka-ahuru
Ko te Kopae-o-te-whare
Ko Te Ara-tōtara

Te Huawaiparae koia te korari
Tēnei e te iwi, te wa ki to koutou whānaunga
Te waua mai nei ki te hua i te kai
E kai o koutou mata ki runga o Paparatu

Karokaro i te taituri o koutou taringa kia areare ai
Me te whakarongo atu ki ngā ki atu
Kaua ahau e patua
Moku anake Te Arai-o-Tūranga
Te matenga ō Mahaki
I mau ai i te rongo patipati
I mātakitakina a,
Koia hika matakitaki
Whiti ke mai koe i rainahi nei

Te ai o mahara ka mate au i Waerenga-ā-hika
Te ki mai koe me whakawā marire
Hopu ana koe i ahau, kawe ana ki Wharekauri
Ka manene mai au ki ro te wai
Ka u ana ko Whareongaonga
Ka pa ko te waha o te Kawana ‘E hika ma e’
Ina ia te kai, toia ki uta ra, haehaetia ai
Tunu ai i te manawa ka kainga, ka pau
Mo koro Timutimu, mo Tauranga-koau
Koia te riri pokanoa
Ka kai ki te waipiro, ka kai ki te whakamā ki te mauahara
Me whakarere atu ēna mahi kino 

E hika ma e...!

Taku aroha ki a koutou
I te ahiahi kauruki nei
He waka ia rā
Kia tōia ngā mātārae kia rautahi ra
Omanga waka, te Ruawai
Ka hokai au kai Marutata

E hika hoki e kuika nei
He matua ia ra e tahuri mai
Nā wai te mea ka ruku popoi
Ka whakamate ki tona whenua

I moea iho nei e au
Ko manuhiri taku awhi kura
Oho rawa ake nei ki te ao
Ko au anake te tuohu nei

Nā Te Kōti Arikirangi Te Tūruki

Kāore te pō nei morikarika noa 

Te Ohonga ki te ao mapu kau noa au
Ko te mana tuatahi ko Te Tiriti o Waitangi
Ko te mana tuarua ko Te Kōti Whenua
Ko te mana tuatoru ko te mana motuhake
Ka kīa i reira ko te rohe pōtae o Tūhoe
He rongo ka houhia ki a Ngāti Awa
He kino ano rā ka āta kitea iho
Ngā mana māori ka mahue kai muri
Ka uru nei au ki te ture Kaunihera
E rua aku mahi e noho nei au
Ko te hanga i ngā rori ko te hanga i ngā Tiriti
Pukohu tairi ki Pōneke rā
Ki te kainga, ra i noho ai te Minita
Ki taku whakaaro ka tae mai te poari
Hei noho i te whenua e kōtitia nei
Pa rawa te mamae ki te tau o taku ate
E te iwi nui e tu ake ki runga rā
Tirohia mai ra te he o aku mahi
Maku e kī atu, nōhia, nōhia
No mua iho ano, no ngā kaumātua
Nā taku ngākau i kimi ai ki te ture
Nō konei hoki au i kino ai ki te hoko Hi! 

Hei aha te hoko e!

Nā Te Kōti Arikirangi Te Tūruki

E pa to reo
E te Tairāwhiti e ..
Pākatokato ai te aroha i ahau 

Me tika taku rori..
Me tika ki Maketu ra..
Hāngai tonu atu te rae kai Kohi 

Kai atu aku mata...
Kai atu ki Mōtu ra..
He huihuinga mai no ngā iwi katoa 

Hoki atu e te kino...
Hoki atu ki to nōhanga..
Kai te haere tonu mai ngā ture 

He aha rawa te mea...
E tohea, riria nei e..
He tuahae kai kōrerotia te rongoa pai 

Me tu ake au...
I te marae o te whare nei e..
Ki te whakapuaki i te kupu a te Hūrae 

He aroha ia nei...
Ki ngā mōrehu o te motu nei e..
Mo ngā kupu whakaari e pānuitia nei 

Mā koutou tātau...
E kawe ki te wai wehe ai e..
Kia mutu ake ai te aroha i ahau

Whakawairangi ai oku nei mahara 

Tiro noa atu ra ki te ao tākiri
He aha kei taku ihu e waitohu noa nei
Ko ahau kai te ngutu e mauria ana mai
Mo tāku kai kapotanga i te ure o te tangata 

E hoa ma e, kai te takaware atu
Ko te mate i te kai taurakau ana
Ko te puke i hakahaka ka pau te hapai
Rite rawa ki ngā hiwi, ki Maungapōhatu
Maunga tipua ra kai reia e te huka e 

Kai mai koutou i te kai a Tiki
He mea ai ko toku kua pukawatia
Nāku rawa i maro iho ki te rau kawakawa
Moe iho ai au i te moe korohiko
Kai te whare pora hau o Hine-te-iwaiwa e

Mei pēnei ana te Tinana ki te tau
Me te wairua ra e moa iho nei
Taku whakarehu iho tuarua rawa mai
Oho ake ki te ao he wairua turaki
Whai noa atu au he wairua atua koe…